महिला फुटबलमा गोल वर्षा, दुई खेलमा ३६ गोल

राजधानीमा जारी महिला फुटबल लिगमा विभागीय टोलीले गोल वर्षा गर्दै विजयी भएका छन्।
विभागीय टोली त्रिभुवन आर्मी महिला क्लबले सुदूर पश्चिम महिला फुटबल टोलीलाई २०-० र सशस्त्र प्रहरीको एपिएफले पश्चिमाञ्चल महिला फुटबल टोलीलाई १६-०ले हराएका छन्।
ललितपुरस्थित एन्फा कम्प्लेक्समा भएको पहिलो खेलमा आर्मीले २० शून्यले हराउने क्रममा शर्मिला थापा मगरले डबल ह्याट्रिक गरेकी छन्। यस्तै दीपा अधिकारी र कृष्णा खत्रीले पनि ह्याट्रिक पुरा गरेका छन्। थप गोल दीपा राई र सुमित्रा बोम्जनले २-२ र अञ्जली वाइवाले एक गोल गरेका छन्।
यस्तै आजै भएको दोस्रो खेलमा एपिएफका लागि लक्ष्मी पौडेल र सविता भण्डारीले ४-४, साजना रानाले ३ अनु लामाले २ तथा अनिता केसी, मञ्जु दोङ र अनिता बस्नेतले १-१ गोल गरे।