नेपाली क्रिकेटको सम्मानमा आइसिसी र नामिबियाका कप्तानले व्यक्त गरेको खुशी यस्तो छ

काठमाडौं । नेपालले तीन वर्षपछि घरेलु मैदानमा आइसिसी विश्व क्रिकेट लिग च्याम्पियनसिपको सफल आयोजना मात्रै गरेन, विश्व क्रिकेटको ध्यान आफूतिर आकर्षित गर्न सक्यो । लिगका यस अघिका खेलमा पपुवा न्युगिनी र स्कटल्याण्डसँग ४ खेलमा पराजित भएपछि नेपाल दबाब थियो । तर, गृह मैदान नेपाललाई फाप्न पुग्यो ।
पहिलो खेलमा गत शनिबार नामिबियालाई ५ विकेटले जित्यो भने सोमबार रोमाञ्चमक खेलमा उच्च रन चेज गर्दै तीन विकेटले पाखा लगाएपछि नेपालको चर्चा चुलिएको छ । नेपालको जितलाई विश्व क्रिकेटको सर्वोच्च संस्था आइसिसीले सिरिज जितेपछि नेपालले च्याम्पियनसिपमा ५ स्थानमा फड्को मारेको विषयमा समाचार लेखेको थियो ।
भूकम्पले जर्जर भएको नेपालमा आइसिसीका सहयोगमा भएको खेलमा नेपालले उच्च प्रदर्शन गरेको जनाएको छ । आन्तरिक क्रिकेटको संस्थामा तीव्र विवादकाबीच नेपालले खेल जित्नुलाई महत्का साथ हेरिएको छ ।
आइसिसीको नेपाली क्रिकेट कल्चरको विषयमा निक्कै तारिफ गरेको छ । १० हजारले टिकट काटेर र त्यति नै संख्या स्टेडियमबाहिरबाट पनि समर्थकले क्रिकेट हेरेको लेखेको छ । नेपाल उपराष्ट्रपतिदेखि प्रधानमन्त्रीसम्मले नेपालले प्रभावशाली खेल खेल्दै जितेको खेलको साक्षी बनेको उल्लेख गरेको छ ।
नेपाल टेलिभिजनबाट प्रत्यक्ष प्रसारण र इन्टरनेटबाट विश्वभर खेल हेर्न पाएको पनि उल्लेख गरेको छ । नेपालको जितमा घरेलु मैदानमा दर्शकबीच खेल्न पाउनु र जित्नु महत्वपूर्ण पक्ष भएको बताएका छन् । नेपालले सफल आयोजना गर्न सक्छ भन्ने सन्देश दिएको पनि पारसले बताएका छन् । नेपालले पहिलो खेल जित्नुलाई महत्वपूर्ण रहेको भन्दै पारसले टिमले अझै आगामी अगस्टमा नेदरल्याण्डविरुद्ध हुने खेलमा कडा मेहनत गर्नुपर्ने बताएका छन् । दोस्रो खेल जिताउन पारसले शतकीय १०३ रन र शरद भेषवाकरले ७४ रनको महत्वपूर्ण पारी खेलेका थिए ।
नेपालसँग दुवै खेल हारेपछि नामिबियाका कप्तान स्टेफन बार्डले आफूहरु स्तब्ध भएको बताए । तर, बार्डले नेपालमा आएर हजारौ दर्शक अगाडि खेल्न पाउँदा भने खुशी व्यक्त गरेका छन् । नेपाली समर्थक साह्रै नै भद्र रहेका र नेपाली आतिथ्यताप्रति आनन्दित भएको पनि बताएका छन् ।